События

Кавказтәи аибашьра 150 шықәса ахыҵра иазкны! 21.05.2014

Кавказтәи аибашьра 150 шықәса ахыҵра иазкны!

(Иҟалахьоу хҭыск аҟнытә)

     Ақыҭақәа Анхәа , Ҧсырӡха, Ешыра, Аацы ихҵәаӡеит 1878 шықәсазы. Убысҟан Ҭырқәтәылаҟа иагеит сара сабдуцәагьы.

     Иахьынӡаҳаҳаз Синоп иақәшәеит. Инеиз рыҟнытә хыџьара ишаны ҩ-хәҭак ҭахеит. Зыҧсы нхаз дреиуан Аргән Мас. Иара уи уаҟа аҭаҳцәара далалоит. Рацәак мҵыкуан дыҧсуеит Масгьы. Иҧшәмаҧҳәыс ҧшьҩык ахәҷқәа лыманы даанхоит. Лгәы иҭалкит Аҧсныҟа ахынҳәра амлакра дацәшәаны. 1903 ш. аҭырқәа иӷба дақәтәаны маӡала дыӡхыҵуеит Ааҧсҭа аҟәараҿы. Аха усҟантәи аамҭазы Анхәаҟа ахынҳәра иауамызт. Иахырцаз рыдгьылқәа Афонҿыцтәи аберҭыҧ иарҭахьан. Анхара акәым рыдгьылқәа абарагьы иақәиҭымызт. Аацы аҟәараҿы игылан ақазақцәа рпост, Анхәа ақыҭангьы иҷаҧшьон ақазақцәа. Ҧсыуак дырҧыхьашәар аҳәала дыршьуан, убас еиҧш адҵа рыман. Мас иҧшәмаҧҳәыс дынхеит Абгархықә, лашьцәа Ладариаа рҟны. Убраҟа иаарласны длоуит аҧа. Ҭырқәтәылантәи данаауаз лцәалтәымкәа дыҟазаарын. Зыӡбахә сҳәаз ахаҵарҧыс сабду иакәхеит.

     Иҵит 20 шықәса инареиҳаны рџьынџь ахь анеира иақәиҭхаанӡа. Уи ҟалеит 1920-тәи ашықәсқәа рзы, Афонҿыцтәи аберҭыҧ анадыркы, изқәаарыхуаз адгьылқәа анрымырх ашьҭахь. Анхәаҟа биҧарала, иашьарала рҽеибаркны иҭалеит. Адгьыл аҟны иқәтәеит хыҵакырҭак рымамкәа. Ахацәа ааидгыланы аамҭалатәи ақьалақәа ҟарҵеит, аҵлақәа неилажьны аандақәа ркит, ицәаӷәеит, илаҵеит, иаарыхт. Ажәакала, ахҵәацәа рџьынџь аҟны оумашәа аџьабаа баны инхеит, инҵит, иҿиеит, раҧсуареи рмилаҭреи рыхьчеит. Убарҭ ирхылҵыз ҳауп Аҧсуа ҳәынҭқарра аиҭашьақәыргылара занашьахаз.

     Сара аӡәы игәы сырҧшаандаз ҳәа акум сзалацәажәаз ари ахҭыс.

     Зегьы реиҳа хьаас исымоу, иҟаларц исҭахыу акоуп: аҧсуа жәлар агәра ргарц рхы ишаҧшәымоу. Ҳазҭагылоу аамҭа анхара, анҵыра, аҿиара ишатәу. Иахьатәи аамҭа аидеиас иҟалароуп аихаҳара. Ҳара ҳазхылҵыз ауаа егьа аџьабаа рбазаргьы инхеит. Ҳара ҳмаашьароуп, аихаҳара иацаҳҵароуп.

     Аҧсуаа ҳазҭахым егьаҩы ыҟазаргьы, акгьы рылшом. Ҳара ҳхы иазааҳго дарбан изылшо?!

     Иахьатәи ҳҭагылазаашьа ҽеим ҳәа згәы иаанаго: анхара казыжьыз, ихьаҵыз, аџьабаа иацәшәаз иргәаладыршәааит ҳабацәа, ҳабдуцәа ирхыргаз. Махәҿала аџьабаа ауаҩы дашьӡом, деиҿнакаауеит. Аҧсуа жәлар шәхы агәра жәга, хьаҧшра ҟамҵакәа шәынха, шәынҵы, шәыҿиа.

     Ауаҩы дахьыҟам қьанҭажәхоит, аҿиара ахьыҟам ашә акуеит, абызшәа аныҟам – ҳазмилаҭхом, анхара  ахьыҟам – иҳәынҭқаррахом. Аҭоурых аҟнытә иаагоу аҿырҧштәқәа уи дырҵабыргуеит ӷәӷәала.

 

                                                                                                                                                                                                   Алхас Аргән


Возврат к списку

 
 

 

   

 

Официальный интернет-ресурс Национального Новоафонского историко-культурного заповедника "Анакопия". Все права на любые материалы, опубликованные на сайте, защищены в соответствии с абхазским и международным законодательством об авторском праве и смежных правах. Использование любых публицистических, аудио-, фото- и видеоматериалов, размещенных на сайте, допускается только с разрешения правообладателя и ссылкой на www.afon-abkhazia.ru. При полной или частичной перепечатке текстовых материалов в интернете гиперссылка на www.afon-abkhazia.ru обязательна. Адрес электронной почты редакции: info@afon-abkhazia.ru .

Создание и поддержка: Редакция-администрация ННИКЗ "Анакопия". Разработка и техническое сопровождение © NewTechnologies.abkh +7 (940) 9258589

Абхазия, Сухум, 2011-2018 г.